Geguritan Ri -Ri

Ri-ri Mawar

Dening: Wahyu Dwi Lestari, S.Pd

Kawitane, janji wis kaucap saka lambe-lambe pasulayan

Nanging, kowe mingkem bungkem 

Kang asline, dudu hak kanggo kowe

Tanpa rasa mring liyan kokbacutake

Kawitane, jare kowe bakal ngerteni?

Marang liyan sing koksuguhake maneka werna priasan

Ana ngendi rasamu? Pikirmu?

Paringane saka Gusti kokowahi dadi watu

Blaka suta, sakiwa tengenmu kuciwa

Wis suwe awake nggayuh kamardikan pirang taun kepungkur

Polahmu kaya-kaya mawar, nanging, kebak ri-ri kang tumancep

Banjur,

Kokutahi nganggo banyu kasrakahanmu dhewe!

Ya pancen bener kandhane liyan

Yen sanalika aku eling, aku sapa

Kudune mung trima mring laku sing kokseret nang bronggolan, tatu

Kuwi sing kok walesake?

Kabeh kokagahi, kokcencang aneng prau kasengsaran.

Penulis : Wahyu Dwi Lestari