Cerita Cekak Sigarane Nyawa

Dening: WD Lestari

Wektu wis lumaku menyang sumurupe srengenge ing dina Jemuah, aku tumuju menyang salah sawijine terminal ana ing Surabaya. Aku ngenteni tekane bis tumuju arah Kediri. Akeh pawongan uga sing ngantri-antri ngenteni jalaran nyedhaki dina riyaya. Ora sangkan ana sawijine pawongan ndhusel-ndhusel sakehing pawongan. Saking gupuhe, awakku sing lagi sayah klakon ambruk keterak dheweke.

Dhuh!

“Eh, sepurane, aku ra seja. Age-age dheweke ngadegake aku.

Mbokya sing ngati-ati ta, isih luwung aku sing ambruk, hla menawa ana wong sepuh? Kepiye? Wangsulanku sengol.

Hiya, hiya.., genah wis njaluk sepura pisan. Ya wis, aku selak ana urusan.

Wong ra nduwe dur!!! mangkelku ora kena takendha. Dheweke ora ngrungokake lan nyat ngalih. Jan-jane kaya diuber maling apa dianggep maling.

Bis teka. Kabeh padha gemrudug mlebu samar lak ora oleh enggon. Aku oleh kursi bangku loro nomer telu saka ngarep sandhing cendhela. HP-ku muni. Tibakne Emak.

Hallo, Mak. Iki lagek numpak bis.

Waalllaaah, yawis ati-ati, lak wis ngliwati Brakan telpuna. 

Hooh. HP age takpateni.

Mas, mas, kene jik kosong siji. Kondhekture nyeluk penumpange ngongkon lungguh bangku jejerku.

Mudhun ngendi? takone kondhektur menyang aku.

Papar.

Pitulas, Mbak.

Hla sampeyan, Mas? takone marang wong lanang kuwi.

Brakan. Sawise kondhektur ngalih, aku ngrasa kaya nate kenal karo wong iki. Woo iya, sing nabrak aku mau. Sanalika wong kuwi uga nyawang aku.

He, kowe sing taktabrak mau ta? karo mesem.

Embuh. Wangsulku cekak.

Aja nesu ta, Mbak. Aku njaluk sepura maneh wis.

Ra nesu.

Eh, mudhun Papar ta? Ngomahe endi? Aku Ponorogo. Kandhane njlentrehke mecahake rasa atiku sing dirasa dheweke nggrundel.

Aku sekitare Papar kono wae, adohe omahmu. Nangpa kok mudhun brakan?

Ya mulih ta.

Ha? wong iki aneh banget, mulih Ponorogo kok ndadak numpak bis jurusan Kediri Tulungagung.

Pengin kok, ben tau numpaki saben bis. Mengko taksambung bis arah Ponorogo.”

Gendheng!

“Mbak, jenenge sapa? Aku Andriawan.

Ratri.

Apik jenenge, kuliyah apa kerja ing ngendi, Ra?

UNESA. Kowe ya sih kuliyah?

Hooh, neng ITS. Saya suwe pacelathon kuwi saya gayeng wae. Nganti ora krasa wis tumeka Mojokerto. Ana ing terminal Mojokerto aku keturon nganti ngliwati Brakan. Aku eling yen sandhinku mau kaya Awan, ning saiki genti penumpang. Dheweke durung kober pamitan nyang aku. Paling mesakake arepe nangekake turuku. Aku nyandhak HP wis jam pitu.

Hallo, Mak, aku wis tekan Purwoasri, ngliwati Brakan.

***

Tibane dina kanggo kuliyah aktip wektu Senen isuk aku mbalik Surabaya. Aku isih kepikiran karo wong lanang sing nerak wingi uni. Hmmm, nate ana pikiran apa bakal pethuk maneh. He he.. Teka klas aku kepethuk kancaku Nunik. Dheweke age ngejak mlebu klas. Ana ing dina sesuke, Nunik menehi kabar yen isuk ora ana kuliyah. Nanging ana tugas kanggo pengganti. Tugase nekani acara workshop kebudayaan ana ing Gedung Graha Jaya sore kuwi. Kanthi nyewa taksi online, aku lan Nunik mbudhali acara kuwi. Ujug-ujug ana sing ngageti saka mburi.

He! ora ngira banget, mripatku ngaca-ngaca sawise nyawang pawongan kuwi. Sing takanti-anti senajan kawitane njengkelake. Hiya, Awan jenenge. Aku ora bisa kumecap apa-apa sanalika kuwi sadurunge Nunik nepuk pundhakku.

Ra!

Eh hiya, iki  kancaku jenenge Awan Nun. Nunik lan Awan salaman karo mesem. Sajake Nunik nduwe rasa sengsem nyawang praupane Awan sing ganteng, dedege apik, gagah, lan sumeh.

Ayo lungguh neng kene wae, aja ngarep-ngarep, nek ngantuk ketara. Pangajake Nunik. Dheweke njejeri Awan lan takon mawerna-werna bab omahe, kuliyahe, lan liya-liyane. Atiku rada ana sing ngganjel nyawang solahe Nunik sing sajak golek kawigaten marang Awan. Aku ora kuwat nyawang kahanan kuwi langsung nyat ngalih tanpa pamit. Aku milih lungguh neng ngarepe gedhung pumpung acarane durung diwiwiti.

Aku apa butarepan ya? batinku. Karo nata ati sadurunge nyawang kahanan kaya mau, ujug-ujug Awan njejeri lungguhku.

Ana apa kok neng kene?

Ibuku mau telpun, neng njero rame, dadi aku metu. Apusku.

Wo, kowe ora samar ta lak aku dipek kancamu mau? Sajake dheweke seneng karo aku. Awan njaraki Ratri sing nyat raine ngabang.

Loh, ya rapapa ta, ya alhamdulillah menawa cocog. Wangsulanku karo nyawang kembang semboja sing ngawe-awe ing sisih tengen gedhung.

Ra, aku pengin ngomong karo kowe, . Dumadakan omongane ketugel karo wara-wara saka petugas yen acarane arepe diwiwiti.

Eh ayo mlebu acarane wis diwiwiti. pangajakku.

Sawise acara iku Awan njaluk kontak WA-ku. Ujug-ujug Nunik malah menehi kontake dhewe menyang Awan kanthi nyaut HP-ne. Awan waskita banget, dheweke ngerti menawa aku rada keganggu amarga sikape Nunik nyang dheweke.

Ra, mengko bengi tak-chat ya.. Mau omongku durung tutug. Kandhane Awan ngirih-irih supaya ra krungu Nunik. Aku mung manthuk wae.

***

Suwarane gangsir saya nggegirisi. Ana ing wengi iku aku jan ora jenak anggone turu. Apa ya aku kepikiran Awan? Ah! Embuh! Takremke mripatku supaya enggal tumuju menyang ngalam impen sing kebak kembang-kembang wangi. Dhuh! Pangangenku bubrah wis jalaran ana telpun. Kring Kring.!!! E, ladalaahh! Sapa bengi-bengi telpun. Awan? Kembange jan mekrok tenan, adhem ayem ing ati.

Hal..lo wangsulanku alon.

Ra, sepurane ya..

Ana apa? wangsulanku penasaran, amarga ra ana udan tur ra ana mendhung kok dumadakan njaluk sepura.

Aku ngerti rasamu, manut rasamu wae, kowe asline ketarik karo aku ta?

Gak! Njur takpateni telpune. Rasaku amung gronjalan, prakarane apa aku durung paham tenan dhodhok selehe.

Ra, sesuk coba takdeleng saka mripatmu wae. Chate Awan sing takwaca wae njur taktinggal turu. Aku jan kaya kepengin ora peduli marang dheweke. Apa aku cubriya amarga kedadeyan mau awan apa jalaran liyane.

Sesuke aku ora kepengin ngampus dhisik, rasane awak lungkrah. Awan ngabari yen wis ana ing kampusku. Ra, aku kepengin ketemu, tulung. Kok isih neng kene yaa batinku. Aku rada ra kepenak awak. Wangsulanku. Pancen awak ora kepenak babar pisan, pikiran ngrambyang, sirah mumet, lan ati apa maneh.

Angen-angenku nuli bali mikirake yen pancen Awan pawongan sing becik. Hemmmm aku mung percaya wae, yen pancen dheweke jodhoku, sigaraning nyawaku ya bakal kepethuk. Ing wektu iki isih alum rasaku kanggo mbukak lawang ati marang kupu sing kumliwer ing sapinggire krentege jantung jalaran prabote ati wis kapecah dening sing wis-wis nalika semana.

Penulis : Wahyu Dwi Lestari